Paroles

Po fini, tot d'on coup tot trosse
Accutâ stasse d'onna motse

Que vaî onn'écouèla à lacî
Avoué dè coûte dâi miette
De tailli brelhî, de brecî de quegnu
Tant qu'à dâi gotette de cranma

A vo baillî l'iguie à la botse
- Qu'è-te cein ? que sè dit la motse

Saré tiura de pequottâ
Clliâo miette de petit-goûtâ
Quand lâi a quie dein clli grand bole
Dâo bon lacî de l' "Agricole"

A dessâiti on bataillon
De motsè et de mouseillon

S'on vâo se redzoï la panse
Faut que l'âi ausse prâo pedance
A quie sè de pequeliounâ
Lè petit mouî ? Ah ! ma fâi na !

Lo pucheint n'è pas trâo por mè
Lo resto l'è po lè craset...

Cosse deseint noûtra motsetta
Va sè betâ su l'écouèletta
Que rasâve tant qu'âo fin bor
Sè crampoune, plliante son mor

Tot è bin zu po coumeincî
Et sè cheintâi dza eingrossi

Tot d'on coup vaitcé que ludze
Dein lo lacî. Ah ! mè z'ami
Se vo l'avâi vussa budzî
Nadzî, petsî et dzemelhî

Sein pouâi jamé sè ressailli
Et retsampâ et reterî

Recoumeincî ti clliâo voyâdzo
Ceint coup dein clli lacelâdzo
Po sè trova âo fin mâitet
Tota mafîta et sein z'accouet

Dâo dzevaton : rein mé ne budze
La vaitcé nèya... su sa drudze !

adaptation du texte original : Mr. Peach